Toshkentdagi zapravkalarda Ai-100 import benzini paydo bo‘ldi
“O‘zbekneftgaz” aksiyadorlik jamiyatiga qarashli UNG Petro yonilg‘i quyish shoxobchalarida 20-oktyabrdan Ai-100 benzini sotuvi boshlandi. Bu haqda AYQSH tarmog‘i matbuot xizmati xabar berdi.
“O‘zbekneftgaz” matbuot xizmatiga ko‘ra, ushbu benzin import qilinadi. Bir litrining narxi — 15 800 so‘m. Taqqoslash uchun, Ai-92 narxi 10 200 so‘m bo‘lsa, Ai-80 narxi — 6050 so‘m.
Ai-100 hozircha faqat poytaxtdagi sakkizta yonilg‘i quyish shoxobchasida sotilmoqda: Parkent bozori, Aloqa, Chinobod, General Uzoqov, Bodomzor, Qorasuv, Ahmad Donish, Cho‘pon-ota.
Avvalroq “O‘zbekneftgaz” matbuot kotibi 1-noyabrdan Ai-80 benzini narxi oshishi haqida tarqalgan xabarlar asossiz ekanini jamiyatga tegishli AYQSHlarda narxlar eski belgilangan tartibda amalga oshirilishini maʼlum qilgandi. Kuni kecha esa O‘zbekiston benzin bozorida tanqislik va ajiotajni oldini olish bo‘yicha tezkor zarur choralar ko‘rilishi aytilgan edi.
Комментарии (3)